يا معشر النساء اتركوا عنكم حركات الافلام
مليييت والله وغلط لما تجي الوحده تشتكي من زوجها تجي الثانيه تقول ضفي عفشك وعلى بيت اهلك
وكأن الدنيا خلاص وقفت وتبي السي السيد يلاحقها ويترجاها وتكفين وينهار ببعدها كل شي.
بقول لكم اتركوا عنكم هالحركات
والله مليت من بعض الخيالات ومن قصصكم الخياليه
هنا بحب اقول لكم
لما تزعل الزوجه من زوجها وتتعقد الامور نصيحه من قلبي الصادق اقعدي ببيتك
ونظفيه ورتبيه وتكشخي ونامي على سريرك وانتي شبعانه بعد
لكل مشكله بالدنيا حل
والطريقه الصحيحه
انك تعطي نفسك فترة هدوء
وكمان تعطيها لزوجك
فترة هدوء للتفكير وبعدين لما تبرد حرة اعصابك
ناقشي زوجك بادب
ناقشيه وانتي تبين حل للمشكله
مو تنثرين المشكله عشان تكون النهايه لازم ننفصل
لا حلي المشكله واعرفي اسبابها عشان تتجنبوها لانكم تبون تعيشون مع بعض ولبعض وتحبون بعض عشان الحياه عشان اطفالكم
ولان لكل مشكله حل
ولاننا في لحظات الغضب ممكن نجرح بعض بكلام ماله داعي لاننا نحاول الانتقام
باي طريقه حتى لو مانقصد:icon_rolleyes:
طيب لو تعقدت المشكله وحسيت انو لازم احد يتدخل مثل لو تعرضتي للضرب من الزوج
او تعدى عليك بحقوقك او مشكله اكبر مما تتحمليها
او قصر عليك بمصروفك او منعك من شيئ مهم في نظرك وانتي شارطته عليه مثلا دراسه او اي شيئ
هنا
من دون لاتخضعي وبدون لاتقشي عفشك
اتصلي على احد من اهلك يكون شخص عاقل وحكيم نوعا ما ويكون هالشخص شخص يحترمه زوجك وتكون علاقته فيه رسميه
مثلا ابوك او اخوك الكبير او خالك او عمك
ويجلس مع زوجك ويصلح ما بينكم ويهدي الامور
ويفرض شروطك
ويتم الصلح
بها الطريقه افضل من انك تتركي البيت ويتدخل القريب والبعيد
وتكون بينكم فجوه وجفاء يدخل فيها الشيطان بينكم
وتكبر المشكله
وتصيرون زي بعض المتزوجات ندمانات وعلى احر من الجمر بمكالمه او حتى رساله من زوجها اللي طنشها
وانا هنا في صف الزوج حتى لو كانت الزوجه غلطانه وطلعت من غير اذنه او وهي زعلانه ترجع مثل ما طلعت
لان الخروج من البيت ماله معنى وماخذينه احنا كشعب من هالافلام ومن هالمسلسلات
احنا بشرعنا وديننا المطلقه وهي مطلقه ما تطلع من بيتها المفروض الا بعد العده
والارمله وهي ارمله ما تنام الا ببيتها
ومع الاسف بناتنا يزعلون من رجالهم على اتفه مشكله وتعبي الشنطه وتطلع
وانا هنا اقول بلا تعب بلا هم حلي مشكلتك بدون قلق وازعاج
وكمان الفكره الغبيه
لما تزعل الوحده ما تطبخ لزوجها
ولاتنام بسريره
وتمط البوز والكشه طايره والله غللط
انا اشوف لما تزعلي اكشخي وكملي شغلك ببيتك ونامي على سريرك باحلى بيجامه بعد
بالدولاب بلا هم بلا قلق
وصدقوني هالطريقه ترضي الرحمن
وتكسبين زوجك بطريقه او اخرى
لانك بتكوني عاقله وتعرفي كيف تفكري
من الاشياء المهمه لكل زوجه
لاتتوقعي الكثير من زوجك
يعني انه يزعل ويتعب
كثير من الازواج يحبون زوجاتهم لكن طبعهم كذا ما يحبون يعتذرون فقدري هالشيئ
يعني لو لاحظتي ان زوجك اعتذر لك بطريقه او اخرى اقبلي الاعتذار
اما لو كان له سوابق فأدبيه لكن بطريقه حلوه
مو انك تطولي زعلانه انك تعاتبيه
على السلوك اللي سبب المشكله
ولما تتناقشون تناقشوا عن المشكله بحد ذاتها مو عنكم كاشخاص
يعني بدل ما تقولي انت ما تعرف وانت ماتفهم
قولي هذا السلوك ما يعجبني
هالطريقه بالتعامل ما تناسبني
والخ
وانا انصحكم تكثرون قراءه وتتعرفوا على بعضكم وعلى شخصياتكم
وانصح كل زوجه انها تكون لزوجها صديقه واخت وزوجه واخر شيئ تكون كام
اما لو كانت كزوجه وام فاقول لها انها رح تخسر زوجها على الاكيد
موضوع: يا معشر النساء اتركوا عنكم حركات الافلام 
